WKH Aradonga jolo adita nanganirangko janape jolni A·chik Holistic Awakening Movement (AHAM) dolrang Chief Minister Conrad Sangmana Memorandum ko on·angaha.
Aradonga songo donggipa PWD Inspection Bungalow (IB) nokko ru·uta bilsirangna jakkalgija galchipe donani a·selo kutturirang namjahanina aro bolchi tarigiparangba nosto ong·aha ine janapangaha. Iani bidingo Nongstoin a·jani PWD District Executive Engineer na u·iatgenchimoba da·onaba maming ja·kurangko de·anirang dongja ine chittio janapataha. Indakgipa obostani a·selo songni manderang gital RCC IB nokko kutturi ge 4 ba ge 5 babilsi baksa rike on·chinagita AHAM dolrang janapataha.
Aradonga Dilsing Akong aro Umchiak Maspara Gilang Akong songo manderangna dingtang dingtang tom·anirangko daknagita dal·gipa hall rang dongjani a·sel namen neng·nikanirangko man·enga ine AHAM dol janapangaha. Ia neng·nikanirangko komiatnagita dam 2 jolo gital Multipurpose Hall rangko rike on·chinagitaba janapataha. Unbaksana, ia songrang Assam aro Meghalaya ni sima ario ga·akani gimin dingtang dingtang jolko tang·doatani kamrangko galchanga man·gipa biap ong·a ineba uamang parakataha.
Batanggimin somoirango uamangni dabianggiminrangko janapataie, Aradonga PHC ni bilsi 15 na bate chalaienggipa “Karuna Trust” ko sorkari chu·gimik jako ra·e chalaichina, PHC oniko CHC ona ra·dochina, nanggipa bosturangko bariatchina, CHC o dongkamgipa doctor aro nurse rangko watatchina, X-ray, USG, Pathology rangkoba ra·bae a·bachengate on·chinagita AHAM dolrang chittio janapataha.
