Ia changni Lok Sabha election-o manderangna pu·onani gamchataniko u·i ma·siatna aro bang·bata manderangko pu·onanio bakko ra·atnagita da·al salni bako SWGH Ampati antidamo “Dul Doka” ba A·chik jatni dakbewal rikbewalgita damarangko doke sakantina u·iataniko ong·atangaha. Ia mikrakatani programko Chief Electoral Officer, District Administration aro A·chik Theatre, Tura baksa nangrime ong·atangaha jeon chadambe, ma·a paarang aro bi·sa desarang re·bae bakko ra·angaha.
Ia programona a·jani DC aro District Election Officer Hema Nayak mongsonggipa ong·e sokbae, re·baenggipa April 19 tariko batanggimin electionrangona bate bang·bata manderangko pu·onatna didiangan baksana be·ennigita bilgrigiparangna aro re·na amgijagipa buchuma budeparangna noktangoni pu·onaniko dakangahani bidingo aganangaha. Unbaksana je manderangan re·na dona neng·nikaniko man·e dongenggiparangna, pu·onchakram biapona re·banagita wheelchair-rangko on·ani giminba aganangaha.
Ampati Degree College ni Principal Dr. Mamunur R. M. Willy tom·bagipa manderangna aganengon, pu·onanichi an·ching an·tangtangni mikkangchi ong·nasienganiko baseani ong·a maina an·chingo silchidare dongjagenchimoba, pu·onagita sakantian bil donga ine aganangaha. Pu·onani salko chutti ine chane noko dongaigija pu·ona man·gipa sakantian pu·onagita ong·katna nanga maina a·songo songdonggipa ong·e ian sakantini dakna nanggnigipa kam ong·a ineba Dr. Willy ku·pattiangaha.
Ampati Govt. Higher Secondary School ni Principal Jilpash R. Marak, mande sakantian an·tangtangni namnikgipa dilgipako seokna bil gnanganiko aganangan baksana April 19 tariko pilak manderangko pu·opachinagita didiangaha.
Ia programona a·jani SDSEO Emphul Ch. Marak aro Ampati bajarni Committee member rangba re·bae bakko ra·angaha. Una agreba programni bako election ni katta bichongrangko sea gnanggipa robolrangkoba sualangjolaha.
