Ia changni Lok Sabha election-o manderangna pu·onani gamchataniko u·i ma·siatna aro bang·bata manderangko pu·onanio bakko ra·atnagita da·al salo West Garo Hills a·jani Tura Super Market-o “Dul Doka” ba A·chik jatni dakbewal rikbewalgita damarangko doke sakantina u·iataniko ong·atangaha. Ia mikrakatani programko Chief Electoral Officer, District Administration aro Tura A·chik Theatre apsan bakrime Systematic Voters Education and Electoral Participation (SVEEP) campaign nigita ong·atangha jeon bajarona re·bagipa chadambe, ma·a paarang aro bi·sa desarang sokbae bakko ra·angtokaha.
Ia programona a·jani DC Jagdish Chelani mongsonggipa ong·e sokbae, re·baenggipa April 19 tarikni Lok Sabha election-o pu·ona man·gipa sakantikon an·tangni bilko jakkale batanggimin electionrangona bate bang·bata manderangko pu·onatna didiangan baksana ia LS election-o 100 percent pu·onaniko chu·sokatna man·agita didiangaha. Tura Mothers Union ni Secretary Sume B. Sangma ba ia tom·anio dongpae bakko ra·gipa sakantikon ia changni LS election-o an·tangna on·gimin bilko jakkale kragipa mandeko seokchina didiangaha.
Ia tom·anio District official rang aro SVEEP campaign ni member-rangba bakko ra·angaha aro batanggimin somoio ia program ko chatro chatrirangna Tura Government College-oba ong·atangaha. Unbaksana ia tom·anio bakko ra·giparangna election ni bidingo sea donggipa robolrangkoba sualangjolaha.
