South West Garo Hills ni Deputy Commissioner aro District Election Officer Hema Nayak, Lok Sabha election 2024 na sal gittamna skang da·al salo bon·kamgipa tom·aniko dake Ampati-ni DRDA hall-o chanchirimangaha. Ia tom·e chanchianiko dingtang dingtang cell-ni Nodal Officer, Zonal Magistrate, Zonal Police Officer, Sector Officer aro Police Officer rang baksa pu·onchakgipa biaprango tom·tome aro maming champengani gri chu·sokatna man·agita tom·aniko dakangaha.
Ia tom·anio bosturangko watatani aro ra·chaksoaniko, konta 72 SOP on·ani aro pilak election-o dakna nanggni kamrangni bidingo u·iatangaha. Ia election-ko tom·tome matchotatna man·agita Civil Sector aro Police Sector Officer rangko ku·cholsan ong·e bakrime kamrangko ka·chinagita didiangaha. Apsan daken Sector Officer rangko an·tangtangni sector tangtango melie kamko ka·chinagita aro Block Level Officer (BLO) uamangni Polling booth tangko name dake ma·sibatani gimin uamang baksa meligrike kamko ka·chinagita didiangaha.
SWGH-ni Superintendent of Police Vikash Kumar ba bakko ra·e ia election-ni somoio dakna nanggnigipa kamrangni bidingo talate on·angan baksana pu·onani somoio pu·onchakgipa biaprango neng·nikanirangko man·genchim ong·ode ta·raken District Police na u·iatchinagita Sector officer rangna aganangaha.
