Nirok simsakaniko dakenggipa BSF dolrang, Meghalaya Police baksa bakrime mijalo am·sandianirangko dakanio, South Garo Hills sima ari joloniko gue granrangko rim·nagita man·angaha ine koborna parakataha.
200 Battalion BSF dolrangni Meghalaya Pulis baksa bakrime Indo-Bangla sima ariniko rim·a man·gimin gue granrangara chu·gimik Kg 4,900 ong·a jean Lakh 14 mangnigita dam ong·a ine janapataha. Ia man·gimin gue granrangko Bangladesh sima arini sepango galchipgimin nokoniko man·aha ineba pulis dolrang janapataha.
Unbaksana uamangni sandie man·gimin guerangko mikkangchi nambate am·sandianirangko dakangnagita Rongara Pulis thanaona ra·ange donnaha ineba u·iatangaha.
