Lok Sabha pu·onani salo aro ia rebaenggipa somoirango, WGH a·jani ramarango apchangket ong·jachina, polling personnel, Magistrate, Sector officer rangna maming neng·nikani gri re·rurana man·agita jrimgipa bosturangko salgipa truck garirangko, April 17 pringni 5 bajioni April 20 tarikni pringni 5 bajiona dontongatchengnagita WGH ni District Magistrate Jagdish Chelani ge·etataha.
Pu·onani somoio election-ni kamrangna altuae re·rurana man·agita, PWD aro PHE department rangko ramarango pipe rang aro cable rangko gopenganiko janapgimin tarikrango dontongatchinagita u·iatangaha. Unbaksana ramarango nosto ong·e dongenggipa truck garirangkoba rama a·samona jitate donchinaba ge·etangaha.
Una agreba mongsonggipa pekwatgipa ramarango aro ramani samtangtango gariko chalaigipa mande gri minute 10 ba una bate No Parking biapo donjachinagita Section 144 CrPC niamni ning·o pangchake DC u·iatangaha. Ia ainrangko saoba manigija pe·a ong·ode niamo ja·rikbewalgita raka sastiko on·gen ine mikrakatanikoba dakataha.
