Tamsura songni buringo Assam a·dokni Goalpara a·jani sakgittam manderangni manggisiko East Garo Hills pulis dolrangni man·ani ja·mano Assam aro Meghalaya ona adita so·sojengjeng ong·aniko ra·baenganiko nikna man·e Social Activist Cherian Momin jegalate am·sandianirangko name dake kakketgipa bichalko ra·bachina aganangaha.
Sianggipa mandeni ma·drangni aganani gitade Jamor Ali (35), gari chalaigipa Noor Ahmed aro Zahidul Islam ko ma·sina man·gijagipa manderang 15 tarikni attamo Meghalaya a∙dokona gari para rimangani ja·man salgipin 16 tarikni pringo 6:30 baji mango Jamor Ali ni ma·drang phone ka∙atanio ramao cha∙a ringaniko dakenga ine aganataniko u∙ianagita man∙aha. Iani gisepon adita somoini ja·man call ka∙taion uni phone switch off ong∙aha aro jegita call ka∙oba man·jaha ine u·inagita man·angaha.
Uamangoni saksa sianggipa Zahidul Islam Dudhnoi aro Krishnai P.S o gari cha∙uanio mokordoma ka∙anio bak donggipa ong·a aro Jamor Ali Matia P.S, Assam-oni matchu cha∙uanigimin mokordoma ka∙ako man∙giparang ong∙a ine u∙inagita man∙angaha.
Ia a·sel ong·ani ja·pangrangko name dake am·sandie dosi dakgipa manderangko bichalona ra·bachina Assam aro Meghalaya a·dokni Chief Minister rangko ja·ku de·chinagita sianggipa manderangni madrang maharirang didiangaha. Election ong·ani somoio indakgipa a·selrang ong·anichi sima ari jolrango adita so·sojengjeng ong·aniko ra·baenga ine Momin aganan baksana a·dok ge·gni ni manderangko dakgrik sugrikaona sokatgija tom·tome dongchinaba mol·molangaha.
