Mibonpara jean Dalu oni km 11 mangnigita chelgipa songo MP Agarwal Pvt Ltd. ni dolong aro culvert rikanio tik ong·gija kam ka·aniko nike, APA dolrang re·ange nirokaniko dakangaha. Uamangni nirokanio ro·ong aro cement rangko kraagita jakkaljan baksana manderangni nikjamiting somoio uamang cement-ni palo a·mangrangkosa galdape kam ka·enganiko APA dolrang nikena man·angaha ine koborna parakataha.
Ia kragijagipa kamrangko ka·anina company na kam ka·enggipa manderangko dapgimin a·arangko cho·biltaiate kraa bewalo ka·china uamang ge·etangaha. APA dolni agananigitade, MP Agarwal Pvt Ltd. Garo Hills ni Songsak, Kera Mikilsimgre aro dingtang dingtang biaprango kam ka·anioba bang·a jegalanirangkoba songni manderangni parakatanikoba knana man·angaha ine u·iatangaha.
Indakgipa company rangni tik ong·gija kam ka·anichi a·doko rika cho·anirango namen nisiataniko man·enga aro mikkangchi Garo Hills ona ia company ko rimbaaniko dontongatna nanga ine APA dol aganangaha. Unbaksana ia Mibonpara songo kam ka·gipako nirokenggipa SDO, Executive Engineer, Junior Engineer aro gipin jako ra·gipa department ni official rang ta·rakale re·ange nirokaniko dakchinaba didiangaha.
