Da·al salo ICFAI University Tura, World Book Day & Copyright Day 2024 ko ‘Read Your Way’ katta bichongko done maniangaha jeon university ni sak 150 gisiko nanggipa chatro chatrirang, skigiparang aro administrative ni staff rang bakko ra·angaha. Ia programo bakrime skie ra·aniko mesokanigita gipin bida pakwatchakramrangni library professional rangkoba okamataha.
Library Assistant, Babulal Prasad, World Book Day ni gamchatani aro ia gital chasongo Copyright Day ni bidingo talatange ma·sina nangani kattarangkoba aganangaha. Dr. VSB Sangma, ICFAI University ni Advisor aro Campus Incharge, lekka poraina gisik nangchina, skia poraianiko tang·doatchina aro poraina sikgiparangna lekkarangko on·china sakanti sokbagiparangko didiangaha. Dr. Angom Jeevan, Assistant Librarian, ‘From Page to Screen: Navigating Digital Resources and E-books in Library’ ni bidingo talatange, manderangna online gita poraiani bang·a cholrang donganiko aganangaha.
Don Bosso College ni Librarian Rehny Sangma, songsalo ba gittimo lekkarangko sualgrike aro on·gile poraiani namgipa dakbewalko ja·rikchina didiangaha. Unbaksana, NEHU ni Professional Assistant, Dr. Amar Kumar Mondal, ‘Literature & Education’ ni bidingo talatange, ia gital chasongo library professional rangni poraianiko gamchatate ra·atna aro tang·doatna man·anio jak donggiparang ong·a ine aganangaha.
