Mijal salo Tura Don Bosco College o World Earth Day ko “ Planet vs Plastic” katta bichongko done bola wa·a, chiring chibisikrangko ripingna aro mongsongbate plastic ko jakkale a·arangko nosto ong·atenganina mikrakataniko on·a miksonge Internal Quality Assurance Cell (IQAC) aro Geogaphy Department bakrime ong·atangaha.
Ia program o Don Bosco College ni Principal Fr. Bivan Rodrigues Mukhim plastic rangko jakkale chagrongenggipa neng·nikanirangna nanggipa ja·ku de·anirangko dakchina aro an·tangtangan kang·kare kae a·gilsakko ripingangchina gita didiangaha. Apsan dake IQAC ni Coordinator Dr. Barbara S. Sangma nangchomotgipa mikrakatanirangko kamchi sokate plastic ni namgijako ra·baoni naljoke dongna man·agita didiani kattarangko aganangaha.
Una agreba ia program o ong·telaigipa a·gilsakni nitoani jachipchang rangko mesoke sakantian an·chingni wilwilao donggipa bola wa·a, chiring chibisikrangko naljoke rakkichina gita gisik ra·atangaha. Unbaksa chatro chatrirangna an·tangtangni ma·siani aro u·ianigita plastic pollution ni bidingo a·a chiako ripingna aro uko gipatani cholrangko talatangna a·damko on·angjolaha.
