Tura songjinmao jrimgipa bosturangko salgipa garirangko mongsongbate ”Dumper Truck” ko changni chang a·sel ong·anio chagronge kenanirangko ra·baanina ta·rakkale nirokatchinagita dingtang dingtang NGO dolrang jekai GSU, FKJGP, AYWO, ADE aro FAF dolrang Tura-o songdongenggiparangni palo District Administration-na chitti se·e u·iatangaha. Indakgipa a·selrang batanggimin salrangonin apsan ong·taitaianiko nikna man·enganina songdongenggipa manderangni a∙sel ong∙aoniko naljokatnagita jrimgipa garirangko dingtangmancha somoi done wataniko dakchina DC na chitti see u∙iatangaha.
Gitcham WGH ni DC Sanjay Goyal-ni ge·etgiminko nipiltaie Tura Municipal Board-ni ningo ong·gipa biaprango pringni 7 oni 11 bajiona aro attam 1 oni 4 bajiona jrimgipa garirangko watchinagitaba u∙iatangaha, maina ua somoimitingo chatro chatrirangni skulona re·ani somoirang ong·ani gimin traffic jamrang ong·e neng·nikanirangko man·ronga ineba janapangjolaha. Shillong aro Guwahati songjinmarangogita jrimgipa garirangko songjinmani ramarangko napake re·ruraaniko dakatgija, Tura-oba apsan daken dakchinagitaba mol·molaniko dakangaha.
Apsan daken gitcham WGH ni DC Pravin Bakshi-ni ge·etgimino pangchake, Tura aro sengpangjolo jrimgipa garirangko re·ruraani somoirangko pring 7 bajioni attam 7 bajiona champengataniko dakchinagita didiangan baksana a·selo ga·akgipa aro uni nokdangna on·pilskaaniko dakchinagitaba didiangaha.
Jrimgipa garirangko somoigita watatniko dake Baghmara, Dalu aro Chokpot oni re·baenggipa truck garirangko Darengre-o neng·takatchina, Paikan, Krishnai, NGH aro EGH-oni re·baenggipa truck garirangko Rongram-o neng·takatchina, Mankachar, Phulbari aro SWGH oni re·baenggipa truck garirangko Damalgre-o neng·takatchinagita DC-o mol·molaniko dakangaha. Iarangko dakanichi aro garirangko ta·rake salanirangko champenganichi mikkangchi a·selrangko chagrongaoniko naljoknagita man·gen ineba agandapangaha.
