Re·anggipa April 16 tariko South West Garo Hills Garobadha songjinmani ning·o donggipa Ghandipara songo, Community Mela ong·atgipaona re·anggipa bilsi chu·ongkugijagipa sak 2 me·chik bi·sarangko dra·e til·ekanio bako donggipa mande sakgittamko, SWGH aro Assam a·dokni pulisrang bakrime am·sandianichi rim·nagita man·aha ine a·jani SP Vikash Yadav koborna parakataha.
Ia koborko man·e dingtang dingtang organisation ba dolrang jegalaniko dake, dosi dakgipa manderangni kosako raka sastirangko on·chinagita didiangaha.
SP ni agani gitade, ia a·sel ong·ani jamano sak 1 dosi dakgipako biapko wate night bus-o Guwahati songjinmachina re·angengmitting somoio garioniko pulis dolrang rim·nagita man·aha. Sakgipin dosi dakgipako Assam ni sima a·ri jolo donggipa Teporpara songoniko rim·nagita man·aha aro gittam gipa dosi dagipako, Guwahati songjinmaoniko Assam pulis dolrang rim·e Garo Hills ona singsandianio dakna rim·bae donangaha ine aganangaha. Iana agreba bako donggipa manderangko am·sandianiko dakangkuenga ineba SP aganangaha.
