Da·al salni bako SWGH Zikzak jolo poraienggipa chatro chatrirang jemangan ki·taprangko bree jakkalna man·pagijagipa bi·sarangna niroke suale on·chinagita adita ki·taprangko Garo Students’ Union Zikzak Unit skulni skigiparangna pakwate donangaha. Iasan ong·aigija uamangni dingtang dingtang neng·nikanirangko golpoe ua jolni skulrangna man·a dipet mikkangchi dakchakna aro niroknagitaba GSU ni President Silman M. Marak aganangaha.
Re·anggipa bilsirango uamang chatro chatrirangna indin tuition rangko ra·nagita dakchakangan baksana poraiani ki·taprangkoba on·angoba joltangni skulrangna ki·taprangko chu·ongagita tikatna man·kujaenga ine aganangaha. Apsan daken chatro chatrirangna aro skigiparangna neng·nikani somoio uamang apsan ong·e kamko ka·e dakchakna miksonganiko Marak janapangaha.
Poraienggipa bi·sarang chu·ongagita ki·taprang dongjani gimin badiaba subject rango namgipa mark rangko man·e pass ka·nagita man·angjaha. Indake ong·genchimoba skie ra·enggipa chatro chatrirangko gisiko nange poriachina aro neng·nikanirangko chagrongani salrango uamangna u·iatchinagitaba didiangaha. Ki·taprangko chu·ongagita on·a man·jagenchimoba da·al salo Zikzak Ganggipara UP skulna aditako ki·taprangko tikatna man·ani gimin GSU ni President uni nama skaniko on·angjolaha.
