Meghalaya a·doko skanggipa changna cha·anirangko tarisusaatna “Hills on a plate: Meghalaya Chef Wars” ko a·doko song·na ritna changbegiparangko susaataniko a·bachengatangengaha jekon JioCinema-o mesokaniko dakangenga ine koborna parakataha. A·doko song·na ritna changbegiparang saksa sakgipin baksa mikkangchake susaaniko dakanggen aro a·dokni jolni kri dingtang dingtang cha·anirangko tarianirangkoba nikangnagita man·angan baksana chegipana aiao inmangipa boksisko on·anggen ine u·iatangaha.
Ia susaanio chu·gimik episode ge 7 donggen jeon skanggipa episode “MEET THE 7” ko a·bachengatanio, dingtang dingtang bakrangoni song·na ritna changbegipa sak 7 jemaangan bil·tinggrike susanasigiparangko gronganiko dakangchengani ong·anggen. Gnigipa episode-o “Waterfall Trails & Turmeric Tales” ko ong·atanggen jeon Jaintia Hills jolchi re·ange dakbewal rikbewalrangko aro song·a ritanirangko susanasienggiparang nie ra·aniko dakanggen. Unbaksana gittamgipa episode-o “Fishing for Flavors in Garo Hills” ko Garo Hills ni cha·rongbewal song·a channanirangko nie ra·angskagen aro bangki episode-rangko re·baenggipa April 27 tariko u·iatangskagen ine parakataha.
Ia susaaniko ong·atanio Australia-ni MasterChef Sarah Todd, Ardahun Passah, William Diengdoh judges rang ong·anggen aro Gordon Thabah baksa Abigail Pamei host rang ong·angskagen. Ia susaanio bakko ra·enggiparangara Artet Kharsati, Ivan Suting, Adonijah Lyngdoh, Daei Suchiang, Tanisha Phanbuh aro Nambie Marak ong·a.
Ia “Hills on a Plate” susaatanio bakko ra·enggiparang a·dokni dingtang dingtang jatni dakbewal-rikbewal ba song·a ritanio jakkalronggipa bosturangko nie ra·e pilak a·dokni jat gittamni cha·ani ringanirangko song·e rite susanagita nanggen. Meghalaya a·doko dingtang dingtang jolni kri ba biapni kri song·a ritanirangkoba an·ching sakantian nie u·ie ra·nagita cholko man·anggen.
