Re·anggipa Lok Sabha election-o BJP dolni NPP na chakpaanio matnanganirang dongan baksana pu·onanio NPP dolna cheanio kenchaksoaniko Cabinet Minister aro BJP ni dilgipa Alexander Laloo Hek aganchakangaha. A·doko NPP dolna chakpaaniara ma·mong BJP dolni ge·etagitasa ong·an baksana ia ja·ku de·ani bidingo maming sing·doani dongna nangja maina NPP dolni NDA baksa bakrimani gimin uamangna chakpaaniara Meghalaya a·dokosan ong·aija indiba a·song gimikon gipin party rangnaba chakpaaha ine Hek kobor ra·timgiparangna aganangaha.
BJP dolna kam ka·giparang ma·mongni ge·etani kosako knachakgija gipin party rangnasa pu·onahaode ine sing·anina, iani bidingo name tale ma·sinagita altua ong·ja ine Hek aganangaha. Election-ni somoio NPP dolna chakpaanio BJP party nigita doltangni kam ka·giparangna namgipa tarisamsoanirangko on·a man·ja ine matnangengon ia election-o NPP ni noksa osa pu·onani gimin election-na kam ka·anio dingtang dingtang nanganirangni bidingode NPP dolsa ma·sinagita man·gen ine Hek agandapangaha.
Election-ni somoio BJP baksa bakrimanio sak 2 candidate rangoni mongsongbate Agatha Sangmani cheani bidingo NPP dolrang on·tisa neng·nikaniko chagrongenga, maina Congress candidate Saleng Sangma BJP ni kosako Citizenship Amendment Act, Uniform Civil Code aro gipin neng·nikanirangko janape agananichi NPP ni pu·onggiparangko bang·en jajaate an·tangna vote rangko salaha ineba Hek janapangaha.
