Garo Hills aro Bangladesh a·songni sima ari jolo chinirangko niamni a·palo badingsrukani namen batrikrikenganiko da·ororo nikna man·enga. BSF dolrangni dongkame nirikkianiko dakgenchimoba chansokgija truck garirango Bangladesh a·songona chinirangko ra·angenga jekon pulis dolrang ia mamlao bang·a bil gnanggipa manderang jekai politician rangni jak donganikoba sakkirang mesokenga.
Indake saljrakjrako badingsrukanirangko dakenggiparang, bobil dolko chel·chakgipa BSF rang aro bang·a pulis thanarangko re·pakna nanggenchimoba maikai uamangni kosako ia kamrangko ka·na man·enganina name sing·sandina nangenga aro sorkarini kakket kam ka·anikoba niatna nangchongmotenga.
Re·anggipa salo jawilwat ra·e gipatgipao, Baghmara sima ari jolo manderangni jinma chini bostarangko chile donaniko nikgiparangan Garo Hills o niamni a·palo badingsrukani tang·doaniko mesokenga. Sima ari paksao donggipa manderang ia kamna badingsrukgiparangni namgipa damrangko gamna tik ka·ako man·e tangka kamaina cholko ra·skaenga.
