South Garo Hills Chokpot block-ni ning·o donggipa mingsingbegipa Wari Chora-ko nina re·angenggipa manderang wilwila biaprango rongtale rakkigija skatang chips bikilap, plastic bottle aro gipin jabolrangko gale mitchiatengani gimin Chokpot Regional Unit-ni GSU dolrang mikrakataniko on·ataha. Ia biapko India a·songonisan nina re·baaigija gipin a·songni manderangba nina re·batokenga. Indake rong·talgija bosturangko galramramaiode Garo Hills ni mikkim rasongko nosto ka·ani ong·enga ine GSU dolrang parakataha.
Chokpot block-ni ning·o mingsingbegipa Wari Chora san ong·aigija, dingtang dingtang nina nitobegipa biaprang bang·en donga jekai Re·dingni wari, Imilsang wari, Abong chigat, Tengte Rongrep, Patijora, Bandare, Rangtang wari, Warima wari, Rekman dare, Gadak Nawepile dare, Asim dare, Dombe wari, Renang dare aro Tepota dare-rangba gnang ine uamang janapatjolaha.
Ia biaprangko A·chik a·songni manderangsan ong·aigija dingtang dingtang biaprangoniba nina re·batokenga. Ia biapko nina re·baenggiparang an·tangtangni ra·baenggipa bang·a cha·ani ringani bikilaprangko aro plastic bottle-rangko skatang galanichi nitobegipa biaprangko nosto ong·ataniko nikna man·engaha ine GSU dolrang parakataha. Iarangko nike, skatang bosturangko galpajachina aro biaprangko rongtale rakkipachinagita uamang manderangko mol·molataha.
Chokpot block ni ning·o ga·akgipa songrang baksa chanchirimaniko dake gitalgipa niamrangko dona ru·utgijani ja·mano parakatna tik ka·anikoba GSU dolrang u·iataha. Indake ua dongimin niamrangko jarikpachina uamang sakantikon mol·molaniko dakangaha.
