Da·al salo West Garo Hills Tura Walbakgre-ni Green Haven-o Culinary Master Challenge 2024-ko ong·atgipao MasterChef India Season 8 o gnigipa ong·bagipa Nambie Jessica Marak mongsonggipa sokgipa ong·e song·a chananirangko nirokaniko dakangaha. Ia program ko Tura Mother’s Union nigita Nambie ni chu·sokgipa ong·anina dingtang mancha mande ra·aniko dakna ong·atangaha.
Ia culinary challenge o Garo Hills ni bang·a song·na sapgiparang re·bae bakko ra·angtoke an·tangtangni changa sapaniko mesokange tobegipa bijakrangko song·e on·angaha. Iano susagiparang saksa sakgipin baksa bijakrangko songsusaaniko dakangtoke Nambie Marak ni nambee skie on·ani aro ku·pattianikoba man·angtokaha. Bon·kame Ia susaanio Fornia K. Sangma skanggipa gadangko man·e chegipa ong·angaha, gnigipa gadangko Silse M. Sangma aro gittamgipa gadangko Mune Neteida B. Sangma man·angskaaha.
Ia program-o Nambie Marak uni MasterChef ona maikai bakko ran·a gita seoka man·anganiko aro uni Masterchef-o bakko ran·a skang maidakgipa kamrangko ka·anganikoba adita aganangaha. Nambie Marak uni Chennai-o poraimiting somoirango adita song·a ritani gimin mongsongbate Meghalaya aro Northeast a·dokrangni cha·anirangni gimin dingtang dingtang song·ani niamrangko skie ra·angaha. Ia rangko skie ra·ani ja·mano ua dingtangmancha YouTube channel-ko kulie manderangna an·tangni skie ra·gimin recipe-rangni bijakrangko song·e chane mesokna gita a·bachengbaaha.
Uni MasterChef-o bakko ra·miting somoi-o ua Meghalaya-ni dingtang dingtang bijakrang jekai dal na·kam, dodim aro galda na·tokrangko song·e mesokangaha jekon dal·dalgipa Chef rangba ia bijakrangko namen tonikbeaha ineba Marak parakangaha.
