EGH a·jao sakgittam gipin jatko L.P skulrango skigipani kamna rimnapanina Mukul Sangmani mijal salni bako sorkariko matnange agananina, Education Minister Rakkam Sangma talate on·aniko dakatskaaha. Chong·motan je chu·gimik L.P skulrango skigipani kamna nakataniara EGH na ge 68 gnang jean UnReserved na ge 10, Garo/Khasi na ge 55 aro Other ST/SC na ge 3 biaprang ong·a ine u·iatangaha.
Reservation Policy-nigita chu·gimik ge 68 oniko, A·chikrang sak 63 seokako man·aha aro sak 3 seokako man·gipa gipin jat skigiparangara Other ST/SC Category (5%) o seokako man·angskaaha ine Sangma talatangaha.
SDSEO o parakatgimin skul ge·gittamoni ge·sade Assamese Medium School ong·a. Uamangoni sakgni skigiparang Garo subject ko poraigipa ong·a aro MTET porikkaoba Garo subjectkon porikka see pass ka·giparang ong·a ine Sangma u·iatangaha. Indaken Interview ni somoioba Medium of Instruction-o Garo subject ko skina kragiparang ong·ani gimin rimnapna nangao ga·akaha ineba janapangaha. Unbaksana uamang sakgittamko kamna rimnapjaode darangkoba ua biapo Job Reservation Policy-nigita pass ka·atna man·jawa maina ua ge 3 biap other SC/ST na a·kanggimin ong·ani gimin HC ni Roster System-ko ja·rikgijani ong·gen ine Sangma agandapangaha.
Uamang sakgni skulo poraimitingo Garo subject ko ra·ahani gimin aro Medium of language Proffeciency-o kragipa ong·ani gimin kamna rimnapako man·aha ine talatangan baksana uamang A·chik ku·sikchi skina man·jaode ra·galnaba bil donga ine Sangma aganangaha.
