Meghalaya a·dokni Reservation Policy jekon September 12, 2023 o vide Notification NO. PER (AR) 49/2023/Pt/3 ko chu·gimik nipiltaianiko gitcham Justice Mool Chand Garg ni dilanio Expert Committee dolrang baksa April 27 tariko gnigipa changna tom·aniko dake Shillong songjinmao chanchirimangaha. Ia tom·anio Expert Committee-ni sakbri member-rangara gitcham Justice Dr. Satish Chandra, Prof. D.V. Kumar, Prof. Chander Shekhar aro Prof. Subhadip Mukherjee baksana Personnel Department, Government of Meghalaya ni Officer-rangba dongpae bakko ra·angaha.
Ia tom·e chanchirimani somoio a·dokni Reservation Policy ko nambatatnagita niamrangko tarianio manderangni ku·pattiani aro agananirangko ra·chaknagita ru·utgija somoini gisepon Public Notice-ko on·e u·iatanggen ine Committee dolrang tik ka·angaha. Unbaksana bako ong·giparangni aganani aro ku·pattianirangko man·soani ja·mano Public Hearing-rangko Shillongo aro gipin a·jarangni Headquarter-rango ong·atanggen ineba Committee tik ka·angaha. Iani bidingo chanchirimaniko daktainagita May jao gittamgipa tom·aniko ong·atanggen ineba u·iatangaha.
