Da·al salo Meghalaya Forest Training School (MFTS) ni 28 gipa Convocation-ko Williamnagar-o ong·atangaha jeon sak 11 forest guard trainee rangni basic training course-ko matchotanina mande ra·aniko dakangaha.
Forest department-o kam ka·giparangni rakbee aro on·kange kam ka·anina Meghalaya-ni Principal Chief Conservator of Forest (PCCF), H C Chaudhary, IFS uni mittelpilskaani kattarangko aganangaha. Ia training rangko man·anichi mikkangchi uamangni dakna nanggni kam aro daitorangko nambate ka·nagita aro uamangni changa sapaniko tang·doatnaba dakchakanggen ineba Chaudhary aganangaha.
MFTS ko 1994 bilsio East Garo Hills a·jani Darugre-o a·bachengataha jean Meghalaya sorkarini Forest and Environment Department-ni mongsongbatgipa skie ra·chakram ong·enga. Ia biapon forest guard rang Silviculture, Forest Botany, Forest Acts and Laws and Forest Survey aro gipin subject rangko ja 11 na training rangko ra·angenga. Ia skulko da·o ong·enggipa campus jean Williamnagar ni sepango donggipa Baiza-o re·anggipa 2016 bilsini 26 November oni a·bachengataha.
Ia bilsini trainingo skanggipa gadango Shambrwell Lakhiat 88% ko man·e chu·sokgipa ong·aha, gnigipa gadangko Jacques Wahlang 80% man·angaha aro gittamgipa gadangko Cedrick Syiem 78% ko man·angskaaha.
