North Garo Hills ni dingtang dingtang department rango pilak kamrangna rakkianio suk ong·gijaniko songdongenggipa manderangni changni chang janapaniko man·e, Rongrong ni MDC Rinaldo K. Sangma, kamrangna galenggiparangni palo Deputy Commissioner aro District Select Committee (DSC) ni Chairman na chitti sedoataha. North Garo Hills a·jao poraia skia donge kamna sapgiparang donggenchimoba gipin a·jarangonikosa bang·a department rango contractual kamrangna rakkienga ine Sangma parakataha.
Meghalaya a·doko pilak biaprango contractual aro permanent kamrangna a·jatango song·dongkamgipa poraia skia matchote sapgiparang dongode a·jatangnikon kamna rakkia aro gipin a·jarangoniko bang·bata changon je kamnaba ra·chaka dongja ine Sangma talatangaha. Mikkangchi kamrangna rim·napengon a·jatangni man·a krabatgipa manderangko seokchina ua DC aro DSC ni Chairman ko mol·molangaha. Ia namgipa kamko chu·sokata ong·ode North Garo Hills ni manderang pangnaba mittelanggen ine Sangma janapangaha.
