Tura songjinamao songdongenggipa manderangna china neng·nikaniko ta·rake nirokna nangenganina aro chirangko chu·onge watna man·agita gari su·sranggipa dokanrangko antio salgni kulichina West Garo Hills ni DC Jagdish Chelani ge·etataha. Section 144 CrPC ni bilko jakkale pilak gari susranggipa dokanrangko Sombar aro Bristibar salo mangmang kulichina, unbaksana bore ka·gimin chiakolrangko jakkaljachina Chelani u·iatangaha.
Ia ge·etataniko da·aloni a·bachengate May 15 tarikona kingking ja·rikanggen aro ian Tura municipality ni ning·o ong·gipa gittimrangna mangmang ong·gen. Tura municipality o songdongenggipa pilak gittimrangkoba noktango aro songsalo chirangko simsake rakkie jakkalchina DC mol·molataha. Unbaksana, gari su·sranganirangko dontongchina didianikoba on·atjolaha.
