Garo Hills-o inditan nitobegipa biaprang, a·bri a·churang, bol wa·arang, ma·manti bibalrang, matburingrang aro dakbewal rikbewalrang donggenchimoba, ua biaprangona re·ange u·ie ma·sie ra·nagita poraienggipa chadamberang cholrangko man·jaenga. Indake ong·engon an·chingo NEHU Tura campus donga jean ia chasongni poraienggipa chadamberangna sandirikkitanirango ba u·ie ma·sie ra·anirango dakchaknagita cholko on·a ama. Ia tikkelna nangani chasongo dingtang dingtang cholrangko NEHU-nigita dakchake adita cholrangko on·genchimode an·ching Garo Hills ni poraienggipa chadamberangba namgipa gadangrango chu·sokaniko niknagita man·gen. Indake NEHU Tura campus-ko nambatatna aro adita nangdapanirangko GSMC dolrang janapate NEHU ni Vice Chancellor Prof. P. S. Shukla na Memorandum ko on·angaha.
NEHU Tura campus-o bang·bata skigiparangan contractual basis-osa kamrangko ka·enga aro mitamrang retired ong·ange skigipani biaprang bangbang ong·e dongenga ine janapangaha. Indake retired ong·gimin skigiparangni biapo gital skigiparangko rimnapan baksana contractual basis-o ka·enggiparangko regularise ka·chinagita didiataha maina skigiparang chu·ongjani a·selo, poraienggipa chatro chatrirangna an·tangtangni poraienggipa subject rangko skie ra·anio neng·nikanirangko man·enga ine u·iatangaha.
NEHU Tura campus Shillong songjinmao donggipa mongsonggipa campus-oni 350 km mang chel·ani gimin, Tura campus-oba Deputy Registrar aro Asst. Registrar ko songna nanganiko janapataha jedakode Tura campus koba apsan daken nambate chalaina aro niroke kamrangko ka·nagita man·anggen ine GSMC dolrang janapangaha. Unbaksana 2023 bilsionin da·ona kingkingba Tura campus-o head of the institution donggija chalaibaenganina, University ko nambate chalaina man·agita Pro Vice Chancellor koba ta·rakkale songe on·china didiangaha.
Tura campus-o ge 9 department rang gnang jean Arts, Science aro Commerce stream ko ra·gipa chatro chatrirangna Masters degree ko poraianio namen neng·nikaniko man·enganina, Garo Hills-o donggipa college rang jean NEHU ni bak ong·enggiparango department gitalrangko ra·bae on·chinagitaba didiangaha. Uamangni ra·gate on·a janapgimin department rangara Sociology, Psychology, Political Science & Public Administration, Geography, Master of Commerce, Master of Education, Master of Tourism & Tour Management, Anthropology, Linguistics, Cultural & Creative Studies, Physics, Chemistry, Biology, Mathematics, Bio-Technology, Zoology aro Botany ong·a.
Una agreba Tura campus-o da·onaba nangchongmotgipa Strong Room jeon porikka sechaknagita dingtangmancha tarigipa dongkujaenga ine janapataha. Pilak college ba University rango Strong Room dongagita pilak porikkarangko sechaknagita dingtangmancha tarie on·china janapangaha. Da·o ong·enggipa NEHU Tura campus ko chalaia bilsi 5 ong·pilahani gimin, UGC ni dongimin niamo pangchake, NEHU Shillongni bipeksan ong·aigija jakgitel ong·e chalaina on·chinagitaba didiangaha maina headquarter Shillong-ona re·nagita namen chel·begipa rama ong·a ineba janapataha. Poraiani bidingo maiba am·sandianiko dakna ba u·ie skie ra·nagita gipin a·dokchi re·na nanganirangna chatro chatrirangna on·a nanggipa korosrangkoba mitam department rang tik ong·e on·jaenganiko kobor man·soe iarangni bidingoba department rangko nirokatchinagitaba didiangaha.
Indake pilak chatro chatrirangni mikkangchi poraia skiani gadangko namdapatna aro skigiparangnaba namgipa cholko on·an baksana Garo Hills o songdonggipa sakantina namgniko ra·banagita, kosako janapatgimin nanganirangko ra·bae ba a·bachengate on·chinagita GSMC dolrang Vice Chancellor ko didiangaha.
