Mijal salni bako Chief Conrad Sangma aro Chief Secretary DP Wahlang, line department-rang baksa tom·aniko dake chirang dongjae neng∙nikaniko man·enganina a·dokni damgni mongsonggipa songjinmarango chirangko chimonge don·china gita ge·etangaha.
A·doko ding·anirang batrikrikengani a·selo Shillong aro Tura songjinmao mongsongbate china dilanirangko adita somoirangonin chagrongna nangao ga·ake songdongenggipa manderang namen neng∙nikanirangko man·enga. Mikkarang da·ororo ta∙rake wajagenchimode obostarang namjaroronaba donga ine official-rang u·iatangaha.
Ia ong∙genggipa obostani ja∙pang ara global warming-ni a·selo dinganirang batrikrikani gimin ong·enga aro iani bidingo sorkari maming namdapataniko ka∙na manjawa ine PHE Minister Marcuise N Marak aganangaha. Indake adita jarangna mikkarang wajagenchimode an·ching namen china dil·anirangko man·e bang∙a neng∙nikarangko chagronga nangaona sokgen maina Tura songjinmao chi ni dal∙anirang 20% nigita tangonangaha aro iani bidingo chanchiate nion an∙chingna namen kenbeani ong·enga ineba Marak agananangaha.
Ia neng∙nikanirangko naljokatna sorkarini gitaba adita cholrangko sandianiko dakenga aro department-rangkoba ia obostarangna tarisamsoe dongna gita ge∙etataha ine Marak agandapangaha.
