Congress-ni Working President aro gitcham Minister Deborah C. Marak-ni kosako constituency-ni namgnina kamrangko ka·anio aro dingtang dingtang project rangko jako ra·e kam ka·anirango chu·soke ka·e on·ja ine PHE Minister Marcuise Marak-ni matnange agangipa kattarangni kosako kakketgipa ong·ja ine Deborah Marak talatangaha. Ia dinggrikani kattarang re·anggipa April jao Lok Sabha election-na susaani somoio, Garo Hills-ni manderangna Conrad Sangma-chi chalaienggipa sorkario an·tangni ku·rachakgimin kamrangko chu·sokate on·jaenga ine NPP dol-ko matnange aganani ja·mano ong·aha.
Batanggimin somoio Williamnagar-na sorkarini project-rangko ka·nagita tangkarangko chamatgiminko Deborah an·tangan man·aha aro ua kamrangko matchote ka·jaenga ine Marcuise Marak aganangaha. Uni indake agananirangara kakketgipa ong·ja aro Marcuise Marak saksa Minister ong·e Williamnagar songjinmani World Bank-ni projectrang-ko ATW India Private Limited Company-sa jako ra·e project-rangko ka·enga ine maina u·ina ja·manchaka ine ua sing·doangskaaha. Ua project-rangko kam ka·nagita chingni kolrangkosan jakkalnagita on·ataia aro projectrangko ua jako ra·ja ineba Deborah Marak aganangaha.
Ua sorkarina saksa senior ong·e dangdike on·gipa aro Cabinet Minister ong·e sawa ia project-rangko man·enga aro maikai jakkalenga uarangni gimin name am·sandianiko dakchenggija sakgipinko mantnange agananiara a·dokni Cabinet Minister ong·pileba chanchina changgijaniko mesokani ong·a ine Deborah Marak aganchakatskaaha. Ua an·tangni constituency-o mai obostarang ong·enga uarangni bidingoba name ma·sie ra·jaenga ineba janapangaha.
