A·chik a·songo chiring chibisikrang tipangengani aro ran∙anganiko niknagita man·e mikkangchina jajrengsoaniko janapan baksana gittimtangtango bol wa∙arangko ge∙nagita Bernard Marak didiangha. Ia obostarangara A·chikrangni a·ba cha·ani, bolrangko den·e badingchiwalani a·selo da·alo chiring chibisikrangni tiproroanganirangko nikna man·enga. Indake chiring chibisikrangni tiproroangenganira an∙ching songdongengipa sakantina mikrakatani ong·enga ine Marak aganangaha. Unbaksana song·a chananirangko daknagita wa∙alko jakkalengon bol wa∙arangko jakkalgija gas ko jakkalskana ineba Marak ku∙monganiko on·angaha.
Indakgipa jajrengna nanganirangko mikkangchi chagrongna nangjanagita, aman a·songna pattigimin gamrangko tange rakkina, buring bolgrimrangko ripingna man·agita an·ching Environment Day-na mangmangsan sengaigija gittimtangtango, a∙brirangko aro chiring chibisikrango bol wa∙arangko ge·nagita dingtangmancha ma·gipa pagipa aro chadamberangko bang·gija somoirangko jakkale bolrangko ge·chinaba Marak didiangaha.
Apsandaken Tura-o donggipa dingtang dingtang chiring chibisikrang jekai Gandrak bisik, Ringrey bisik, Sangsang bisik aro Rongkhon bisik, iandakgipa chiring dal·dalgiparangni kosakni a·brirango bolrangko ge∙e buring bolgrimrangko ripingnagita Marak ku·monganiko on·e ku·pattiangaha.
