Da·al pringni somoio Shillong Polytechnic-o Civil Engineering-ko 4 gipa semester-o poraienggipa Tura songjinmaoni bilsi 24 ong·gipa Diana Ch. Marak college-ni hostel-o kae siaha ine koborko man·soaha. Ua Predinson Sangma aro Previlla Ch. Marak ni demechik ong·a aro uamangni nok Tura TV tower kisango ong·a.
Koborna parakatanigitade pring 2 bajimangni somoio achakrangni sing·aniko knae chokidar ong·kate nirikkianiko dakon ia chadambe metra uni kutturi ning·o kae siokosa nikataha ine u·iataha. A·sel ong·ako nika bakan Mawlai police thanaona koborko on·ataha aro uni manggisiko Shillong Civil Hospital-ona post-mortem ka·na watataha ine parakataha.
