South Garo Hills Chokpot-ni NGO dolrang jekai GSU, CAVC, FKJGP, GSMC, AHAM aro AYWO dolrang bakrime Chokpot-ni gital Civil SDO Pittingson R. Sangma baksana gital SDPO Anthony Ch. Marak baksa da·ororo jolo chagrongenggipa neng·nikanirangni bidingo janape tom·e chanchirime lekkako on·angaha.
Skanggipao Chokpot jolni biaprangoniko niamni a·palo ro·ongrangko bikotenganiko nirokatchinagita didiangaha. Unbaksana buring bolgrimrangni gamchatani aro maikai buring bolgrimko nisiatanichi neng·nikanirangko chagrongna nangani bidingo manderangna mikrakataniko on·china mol·molangaha. Una agreba Chokpot jolo donggipa gamchatgipa Dareng chibimako ripinge tange rakkina man·agita NGO dolrang chittio janapataha.
Indake dingtang dingtang nanganirangko Civil SDO aro SDPO baksa tom·e chanchirimani ja·mano uamang sakgnini namgipa aganchakaniko man·anina Chokpot-ni NGO dolrang mittelpilani kattarangko aganangskaaha.
