Jammu & Khasmir-oni cycle-o songreenggipa chadambe saksa Shanu Rajput, Fit India Movement-ko ja·rike manderangko pekatgipa ringani cha·anirangko jakkalgija be·en bimangko an·seng baljoke aro mangrake rakkina mikrakataniko on·enggipa Tura songjinmaona sokbaaha. Uni songre songgabatanio da·o dipet ua dam 18 a·dokrangko jaskuo matchotbaaha aro Tura-ko ra·e dam 19 gipa ong·enga ine Rajput Ku·rongdik kobor ra·timgiparangni sing·anio aganangaha.
Rajput Tura-ona mijal attamni 6 bajimango sokbaaha jeon skanggipa ua Chasingre petrol pump-o tuchakna bi·e neng·takon jolni manderang cha·ani ringanirangko on·e dakchakaha ine aganaha.
An·tangni songtang Jammu & Khasmir-oni ua re·anggipa bilsini July 16 tariko ong·katbae Punjab, Haryana, Gujarat, Madhya Pradesh, Maharashtra, Goa, Odissa, Chattisgarh, Jharkhand, West Bengal aro Assam-ko napake da·o Tura-ona sokbaaha ine ua aganangaha. Uni songrebaanio ua neng·nikanirangko bang·en chagrongaha aro apsandaken manderangni dakchakanikoba man·angaha ine parakangaha.
Uni indake songree mesokanichi pilak college ba skulrango poraienggipa aro gipin chadamberangna pekgipa bosturangoni chel·e dongchina Rajput didianiko on·angaha. Una agreba be·entangko mangrake rakkiosa poraia skianio aro dingtang dingtang miksonganirango chu·sokgipa ong·na amgen aro indakgipa kamrangchisa jat ba a·songba silroro namrorogipa ong·gen ineba Rajput ku·pattianiko on·angaha.
