Mijal salni bako North Garo Hills, Resubelpara Cummunity Health Centre (CHC) o songdongenggipa manderrangna cancer sabisini bidingo talate on∙aniko daknagita State Cancer Society of Meghalaya salsana programko ong∙atangaha. Ia programo State Nodal Officer, Dr Anisha Mawlong, State Cancer Society of Meghalaya aro uni karimskarang mongsonggipa sokgipa ong∙e talate on∙aniko dakangha.
Ia programko ong∙atani miksonganiara India a∙songo Meghalaya a∙doko cancer sabisiko man∙giparang bang∙batsranggipa ong∙ani gimin sabisini bidingo naljoke dongna man∙agita aro sabisi man∙a a∙bachengbamitingon sanna banniko dakgenchimode ta∙raken nampilna man∙aniko manderangna talatan baksana sia bon∙anoniko naljokatna gita kamko ka∙ani ong∙a ine Dr. Anisha Mawlong aganangaha. Unbaksana ia sabisiko nirokna ba komiatnagita District Medical staffs, Mid-Level Health Provider (MLHP) aro ANM rangna sanna bannanio nanggnigipa bosturangko chu∙ongagita on∙a nanganikoba aganangaha.
Cancer sabisiko bidingo pilak songni nokni dilgipa aro tomromni dilgiparangnaba talataniko on∙e, sakantikon sabisiko komiatna kamko ka∙china Dr. Anisha didiangaha. Saoba ia sabisini chinrangko man∙genchimode ta∙rake sanchakram biapona re∙bae an∙tangtangko porikka ra∙aniko dakchina didiangan baksana indakgipa sabisiko sanna gita koros nanga gri man∙a amani bidingoba agantalate on∙angaha. Cancer sabisiko a∙doko mongsongbate gue pan cha∙aoni aro sada biri ringaoni ong∙batenga ine ua u∙iatangaha.
Resubelpara CHC ni Senior Medical & Health Officer, Dr Rezia K Sangma, ia programni namgnini bidingo aro cancer sabisini chinrangni bidingo talate on∙angan baksana cancer sabisiko porikka ra∙na gita hospitalo pilak bosturang chu∙ongagita donganikoba aganangaha. Una agreba MHIS nigita namgniko man∙giparang tangka paisa gri sanna bannaniko dakna gita man∙gen ine Dr Rezia K Sangma aganangaha.
