Mission 1 million-ni ning·o pang 10,000 mang bol bi·sarangko Tura ni MDC Bernard N. Marak an·tangni Constituency-o ge·aniko a·bachengatangaha. Ia ja·ku de·aniara mikkangchi Garo Hills-o million 1 na bate bolrangko giproroatnagita ge·aniko dakanggen ine koborna parakataha.
Garo Hills-o Nokmarangni ning·o ong·gipa songrango bola wa·a dongjae chiring chibisikrangni ran·krakanirangko champengnagita miksonge ia mission ko a·bachengataha. Indake bol wa·arangko ge·e da·onin simsaksoja ong·ode mikkangchi mandeni janggina mongsongbate chasong gitalrangna namen neng·nikanirangko chagrongna nangaona sokgen ine Marak mikrakataniko on·angaha.
Ong·telaigipa gamjinrangko aro bol wa·arangko manderangni nisiataniara namen dukni ong·a jeni a·selan mikka balwarangni dingtanganirangko mesokaniara an·chingna mikrakatani ong·an baksana mikkangchi a·gilsak gimiko neng·nikanirang ong·gen ine Marak janapangaha. Ia obostarangko nie sakantian an·chingni gamjinrangko simsaksoe bolgrim wa·grim ong·ataina aro Garo Hills ni college, skul aro A·kingrangoba dolrangko bikote chadamberangko iarango bakrimate bolrangko ge·anirangko dakchinagita Marak didiangaha.
