District Sports Office, Tura salgnina District Level Inter School Athletics Meet-ko Pa Togan Nengminja Track and Field Stadium, Dakopgre-o da·aloni ong·atangenga. Ia kal·susaanio Tura songjinmani ge 30 skul-rangoni sak 730 chatro chatrirang gisiko nangbee bakko ra·angtokenga.
Ia Athletics Meet-ni skanggipa salo SSLC, MBOSE-ni Deputy Controller of Examination Jen Muller P Marak mongsonggipa sokgipa ong·e mikkim dongatan baksana dingtang dingtang kal∙anio chu∙sokgiparangko mande ra·aniko dakangaha. Ua saksa gitcham State Table Tennis Player ong·e a·dokni palo kal∙susaanirangko dakangaha. Marak kal∙susaanio chu∙sokgiparangna boksisrangko su∙alangan baksana sakanti bakko ra∙enggipa kal∙susaagiparangko namgipa bewalo an∙tangtangko on∙kange salantio gisiko nange ranta ka∙anirangko dake an∙tangna aro skulna mingnamgipa bimingrangko ra∙bachina didiangaha.
Tura District Sports Officer, Saljagring M Marak ni aganani gitade, Pa Togan Nengminja Track and Field Stadium-o dingtang dingtang gadangni chadamberangna jekai bilsi 14, 16 aro 18 ni ning∙o ong∙gipa me∙a aro me∙chikrangna kal∙susaanirangko ong∙atenga. Athletic meet ong∙atanio dingtang dingtang kal∙susaani jekai 60 metre, 100 metre, 200 metre, 300 metre, 800 metre, 1000 metre, 1500 metre rangni katsusaani, High Jump, Long Jump, Discuss Throw, Shot Put, Javelin Throw, Medley Relay aro Kids Javelin kal∙susaanirangko ong∙atronga ine Marak aganangaha. Ia Athletic Meet-o skulni skigipa, ma∙apa, Tura District Sport office ni staffrang aro wilwilao songdongenggipa manderang re∙bae bakko ra∙angtokaha.
