Rahul Gandhi ni melibegipa ripeng aro saksa Congress dolni dilgipa Sam Pitroda, jatko basea gnang North East-ni manderangni kosako kragijagipa kattarangko agane Chinese rang baksa tosusaanina, a·dokni Chief Minister Conrad Sangma jegalaniko dakataha.
India a·songo dingtang dingtang dakbewal rikbewalrangko ja·rikgiparang bang∙a jatrang meli nangrime dongengani gisepon, saksa senior Congress dolni dilgipani agangipa kattarangara ra·chakna man·gijagipa ong·a ine Chief Minister aganangaha. Unbaksana batanggimin somoirangoba North East ni manderang jat basee kragija agananirangko bang·en chagrongaha, indiba ia chasongode indakgipa jat baseani kattarang dongjaha ine CM agandapangaha.
Uni gisepon Sam Pitroda India a·songni gipin a·dokrangni manderangkoba Chinese, Arab, an·gil gipok, aro African ine democracy-ni bidingo agan golpogrikanirangko dakani somoio janapangaha. Uni indake kragijagipa kattarangko agananina Congress dolrang Sam Pitroda-ni kosako ja·kurangko de·e kragipa nalisko on·chinaba CM didiangaha.
