Re·anggipa bilsirango CUET porikkako a·dokni chatro chatrirang gipin biaprango sena nangrongani gimin bang·a neng·nikanirangko chagrongangaha aro iani bidingo sorkari aditan ja·kurangko de·angaha. Ia porikkako centralni University-ni bak ong·gija a·doktangni University-ni ning·o sena man·agita sorkari re·anggipa bilsi 2-3 rangna ma·mong sorkario mol·molange naljokatna man·angaha ine Chief Minister Conrad Sangma aganangaha.
Indakgipa neng·nikarangoniko naljokatna a·dok sorkari dingtangmancha Central University jekai NEHU baksa bakrime course-rangko ra·gatna nangjanagita a·doktangni Captain Williamson State University-ko bikote mikkangchi a·dokni college-rang bakrimna man·agita ja·kurangko de·angaha ineba Sangma aganangaha. Iako aganengon Sangma dingtangmancha ma·mong sorkariko Meghalaya a·dokni Tura, Shillong aro Jowai-o porikka sechakram centre-rangko on·a man·ani gimin mittelpilangskaaha.
Indakgipa ja·ku de·aniko ra·bana man·anichi an·chingni chadamberang chel·begipa biaprangona re·na dona nanggija a·doktangon ia porikkako sena man·genok ine Sangma agandapangaha.
