South West Garo Hills a·jao District Malaria Officer Ampati-ni office aro National Centre for Vector-Borne Disease Control bakrime malaria sabisioni naljoke dongna man·agita sam gnanggipa mosorirangko Kumligaon songo sualangaha. Ia somoio bang·a songni nokni manderang namgipa cholko ra·e an·tangtangko sabisioni naljoke rakkina, mosori sualgiparangko re∙bae ra∙angtokaha. Ian manderangko dingtangmancha ganggurangni chikanichi malaria sabisioniko naljoke rakkina medical department-ni jotton ka·aniba ong·a.
Ia sam gnanggipa ba Long Lasting Insecticidal Nets (LLINs) mosorirangko jakkalanichi malaria sabisioni naljoke dongna cholko on·a, mongsongbate malaria man·ronggipa biaprango champengsona dakchakani ong·a. Ian sorkarini aro dingtang dingtang bakrimgimin dolrangni dingtangmancha manderangko an∙sengbaljoke dongna aro malari sabisioni champengsona ja·ku de·aniko mesoka.
