Education Minister Rakkam Sangma, Rongjeng Model Degree College-ko ia bilsionin a·bachengatna miksongenga ine da·al salo kobor ra·timgiparangna parakangaha. Ia college building-ko rika cho·anirang matchotmanahaoba, adita nanganirang jekai chirangko salaniko aro college-ona re·gipa ramarangko matchotsrangkujaengani a·selo a·bachengatna man·kujaengani gisepon Lok Sabha election ni Model Code of Conduct ko ra·galani ja·man kamrangko ka·e matchotate a·bachengatgenok ine Sangma aganangaha.
Ia gitalgipa Rongjeng Model Degree College-o Arts stream ko ra·bae a·bachengatgen aro mikkangchi gipin stream rang jekai Science aro Commerce koba nigrike ra·bagen ine Sangma aganangaha. Unbaksana sanctioned post-rangko nakatate skigipani kamrangna aro dingtang dingtang kamrangko ka·nagita rimnapaniko dakanggen ine Sangma parakataha. Una agreba sorkarini college-o Principal ong·enggiparangoniko Principal in-charge songaniko dakangskagen ineba u·iatangaha.