May 13 tarik Sombar walo, Garobadha jolo buringni mongma mangsa bijolini silitingo nange siaha. Wildlife DFO Rupankar Marak-ni u·iatanigitade, bijoli nange sianggipa mongma bima adita antirangna Wakagreoni Doldigreona jaksa dake re·ruraenggipaoni mangsa ong·a ine talataha. Garo Hills-o bijoli nange a·sel ong·ani matburingrangsan ong·aigija mande baksaba bang·a changon a·sel ong·ronga.
Ua jolo songdongenggiparangni agananigitade batanggimin somoirango ia jaksa mongmarang Garobadha-Selsella ramasamrango roronggiparang ong·a ine u·ina man·aha. Ia a∙sel ong·aniara uamangni Chokingre jolko batsotmiting somoio power department-ni nirokgija galchipgipa bijoli siliting ongipao nangaha ine parakataha.
Indake bijolini silitingrangko nirokgijanichi mande aro matburingrangna namen kenbegnigipa ong·a jeon batanggimin changrangoba bang·a janggirangko gimaataona sokaha. Sianggimin mongmani bimangko porikka ra·e nianiko dakangenga aro matchotani ja·mano namedake talbate u∙iataniko dakanggen ine DFO Marak aganangaha.
