Meghalaya a·dokna Jal Jeevan Mission (JJM) nigita songanti nokrangona ringani chirangko sale on·chinagita ma·mong sorkari gong 786 crore tangkarangko chamatgenchimoba, da·onaba Chokpot jolo nokdang ge·saonaba ringani chiko sale on·kuja ine GSU Chokpot Regional Unit-ni General Secretary Spensar R. Sangma matnangataha. Garo Hills-ni bang·a biaprangon JJM-ni kamrang bimang ong·kujaenga, uanoni Chokpot jolba damsa ong·paa. Chokpot jolo songdongenggipa manderang PHE-ni chiko man·gijaan bilsi 20-rang ong·pilengaha aro da·o Jal Jeevan Mission-ni chiko totaksaba ringe nikuja ineba Sangma raken u·iatangaha.
Chokpoto Jal Jeevan Mission-ni kamrang ja·manchakenganina, Chokpotni nangrimgimin NGO-rang Chokpot PHE-ni SDO-ko changgnina grongna re·angmanahaoba, SDO-ni chokki bangbang ong·akosa nikeronga ine Sangma janapangaha. SDO ni gimin PHE department-o kamko ka·enggipa manderango sing·sandianiko dakon, Office-ona re·bagija songtang noktango dongesa kamrangkon ka·atenga ine aganaha. Uamangni aganchakanina maini gimin re·bajaenga ine sing·on, PHE-o chi dongjani gimin rebakujaenga ine u·ina man·aha.
Chokpot Civil Sub-Division-ni ning·o, saksa Chokpot PHE-ni SDO ong·e indake kamtangona re·bagijaniara kraa bewal ong·ja maina ian jolni manderangna aro PHE department-o kamko ka·enggiparangna neng·nikaniko ra·baanisan ongaia ine uamang aganangaha. Unbaksana indakgipa Officer-rangko Chokpot jolni manderang ra·chakna man·chongmotjawa ine jegalan baksana mikkangchi indakgipa kamrangko ka·angkuode jolni nangrimgimin NGO-rang nie dongjawa aro SDO ni kosako raka ja·kuko de·anggen ine mikrakataniko on·ataha.
Una agreba a·dokni PHE Minister Marcuise N. Marak, Chokpotni nangrimgimin NGO-rangnigita ringani chirangna namen neng·nikanirangko man·ani bidingo janapatan baksana jolo ong·enggipa obostarangko ta·rake nirokatpachinaba mol·molataha.
