South Garo Hills a∙jao JJM-ni ning∙o ka∙gipa kamrangni chu∙sokgijaniko dingtangmancha PHE Minister Marcuise Marak an∙tangan biapona re∙bae nirok sandianiko dakna nanga ine Nokrek Area Development Committee, SGH ni President Semronsing A. Sangma mol∙molataha. Ia nirok simsakaniko dakna agananiara SGH a∙jao bang∙a JJM ni kamrangko da∙ona kingkingba matchotatkujaengani gimin didiataha.
RTI ka∙anio South Garo Hills-ni Durabanda songna JJM project-ko ka·na chamatgipa gong 57,28,000 ko Upper Rongkhon-ni contractor Rahendro M. Sangma jako ra∙e kamrangko ka∙aniara da∙ona kingkingba matchokujaenga ine u∙iatangaha. Unbaksana RTI-o janapgimingita ia songo 179 nokdangrang ringani chirangko jakkalna man∙a nangaha, indake ong·genchimoba ia 179 nokrangoni ge 50 nokdangrangsan chi sale on·aniko man∙kuenga ine uamang parakataha. Ia ge 50 nokrangona chi salaniko matchotaha ine parakatmanahaoba badiaba nokrangona chu∙gimik pipe salaniko dakujaenga ineba aganangaha.
Ia kamko name dake matchotgijaan Rahendro M. Sangma chu∙gimik tangkarangko okangaha ine aganan baksana indakgipa kakketgijagipa kamko ka∙anira cha∙bokani ong∙a ine sing∙doaniko dakangaha.
Awegre Water Supply Scheme-ni ning∙o dam 4 songrang jean Awegre, Anchigre, Rongchangre aro Rongdigre-na gong 1,02,00,000 tangkarangko chamataha jekon Nidanpur-ni contractor Samrath Rabha jako ra∙e kamko ka∙angaha. Ia scheme-nigita chi man∙a nanggipa nokdang 80 donggenchimoba, nokdang 20 rangsan namgniko man∙enga ine Sangma parakataha. Ia dam 4 songrang km 5 mangni chel∙grikao dongoba water tank ge∙sa mangmangkosan rike on∙aninaba matnange aganataha.
Una agreba Anchigre, Rongchangre aro Rongdigre songrango JJM-ni kamrang maming dakeba matchotjani gimin nokdang ge∙saba chi sale on·aniko man∙kuja baksana je water tank-rangko rikgipaba chi joksole bon∙enga ine janapataha. Ia kamrangko tik ong∙gija ka∙aniko bebe ra∙jagenchimode PHE Minister an∙tangan re∙bae kamni obostako niena nanga ine Sangma matnange aganangaha.
