A·gilsako ding·ani batroroaniko aro uarangna baikamgipa cholrangko chanchirimna Meghalaya State Council, Chief Minister-ni dongpaanio da∙alo tom·aniko ong·atangaha. Ia chanchirimaniona PHE Minister Marcuise Marak, Power Minister AT Mondal, Health Minister Dr. Ampareen Lyngdoh, Water Resource Minister Comingone Ymbon, Chief Secretary aro sorkarini gipin official-rangba dongpae bakko ra·angaha.
Ia tom·anio dingtangmancha adita nirokatna nangenggipa kamrangko aro niamrangko ra·gatani bidingo chanchirime tik ka·angaha. Ia somoio Catchment Protection Act, 1990 aro Climate Emergency Framework-ko ra·gatani bidingo adita chanchirimangaha. China neng·nikranirangko nirokatna chibisikrangko gitaldake tangchapilatani bidingoba ia tom·anio golpogrikangaha.
Unbaksana bolrangko ge·ani, buring bolgrimrangko nirok simsakani cholrang aro Agroforestry-nigita kamrangko a·bachengate a·a chiako nirokaniko dakna chanchirimangaha. Iasan ong·aigija External Aided Project (EAP) nigita KfW Catchment Area Protection Project aro gipin project-rangkoba nipiltaianiko dakangaha.
Ia ong∙genggipa obostarangoni mikkangchi naljoke dongna dingtangmancha songrangko seoke nanggipa ja∙kurangko de∙e chibisikrangko tang∙chapilatani kamrangko ka∙angna chanchirimangaha. Una agreba PHE department a∙dokni ge 747 mongsongbatgipa chibisikrangko sandie nisanko done ripingani kamrangko a∙bachengatnaba manchiangaha.
