Assam a·doko pulis dolrangni maming bilko on·agri aro a·songni constitution-o dongimin niamko pe·e Christian organization-rangni kosako sinjetaniko on·enganina suk ong·gijaniko saksa Social Activist Cherian Momin parakataha. Indake pulis headquarter-rangoni ge·etako man·e, pulis dolrang Christian-rangni kosako nirikkianirangko dakaniara India a·songni Constitution ni on·gimin bilrangko pe·ani ong·a ine Momin jegalataha.
India a∙songni constitution-o article 21-o dongimin niamogita pilak manderangni janggi tanganiko jinmana parakatgijani ba Right to Privacy aro Article 25 nigita je toromkoba ja·rike bebe ra∙na bil on·gimin donga. Iani gisepon Assam a·dokni pulisrang Christian-rangni olakkichakram biaprangchi toromko dilgiparangna maming u·iatagri napdrae jachipchangrangko ra·e aro ra·chakna man·gijagipa sing·anirangko dakaniara Christian toromo bebe ra·giparangna kenaniko ra·baan baksana songsalo ka·dongani gri ong·aniona sokata ine Momin janapangaha
Indake Assam pulisrangni niam ni a∙palo kragijagipa kamrangko ka·enganina, United Christian Forum (UCF) dolrang District Commissioner-na memorandumko on·e mande sakantini tom·tomanina indakgipa kamrangko dontongatchina didiangaha. Uni kosakon UCF dolrangni Assam-ni Chief Minister-na suk ong·gijaniko u·iatanina Assam pulisrangni an·tangtangko dos gri ine mesokani aro talataniara namen aiao inmanpilgipa ong·enga.
Songsalni namgnina kamko dangdike on·gipa saksa ong·e Assam pulisrangni Christian organization-rangko niamni a·palo nirikkie kragijagipa kamrangko ka·aniko raken jegalatan baksana indakgipa kamrangko bakan dontongatchina aro India-ni constitution-o pangchake jakgitel ong·e je toromoba bebe ra·na aro toromko nangatgija tom·tome janggi tangna man·agita daito donggiparangko nirokatchina Momin didiangaha.
