A·chik Holistic Awakening Movement (AHAM) dolrang NGH Bajengdoba-ni Rongjalenggre Govt L. P skulona re·ange nirokeaniko dakangaha. Uamangni nirokeaniko dakani somoio skulni official-rang baksa adita nanggnigipa kamrangni bidingo agan golpogrikanirangkoba dakangaha ine parakataha.
AHAM dolrangni u·iatanigitade, ia L.P skulo class nursery-oni class V ona kutturi ge·saosan skianiko dakenga jeon chatro chatrirangna biaprang apchangket ong·ani a·selo skie ra·nagita ja·manchakenga ine janapataha. Unbaksana ia skulo skigipa saksasan ong·e chatro chatrirangna skie on·anio namen neng·nikani ong·enga ineba u·iatangaha.
Una agreba skul nokni pakmarang bretangengahanina aro nokkingrang napruani a·sel mikka chirangni seldapanikoba cha·grongenga. Ia skulko 2023 bilsio taridapna ku·chakgimin kattarang donggenchimoba da·onaba taridape on·anirang dongkuja ine ma·sinagita man·angaha. Ian bi·sarangni skie ra·anio namen neng·nikaniko on·an baksana skigipa aro chatro chatrirangko a·sel ong·e saknaaoniko naljoke rakkina ta·raken nirokatna nangani ong·a ine AHAM dolrang janapangaha.
Skichakram biaprango indakgipa obostarang ong·engon, a·dok sorkari aro a·jani daito donggipa department rangko ta·rakkale nirokate kamrangko ka·china didiangan baksana skul nokko taridape on·aniko ru·utate donenggipa jako ra·gipa contractor-ni kosako nanggipa ja·kurangko de·chinaba AHAM dolrang dabiangaha.
