A·chik Conscious Holistically Integrated Krima (ACHIK) dolrang Meghalaya Job Reservation Policy, 1972 ko maming dingtangataniko dakgija Job Reservation-o pangchake kamrangko on·china State Reservation Policy-ni Expert Committee na A·chik jatni palo chitti sedoangaha.Skanggipao Meghalaya Job Reservation Policy, January 21, 1972 dongimin niamo pangchake, A·chikrangna a·kange dongiminko maming dingtangataniko dakgija apsankon donchina didiangaha. Uni gisepo 0.01 percent mangnigitamangba dingtangataniko dakgenchimode, A·chik jat aro dingtang dingtang dolrang ra·chakna man·jawa ine janapangaha.
Gnigipao Reservation Roster-o a·dokni aro Others ba gipinrangna kam sualna dongimin bako Zanera R Marak ni November 9, 2022 bilsio Meghalaya High Court-ni rai on·giminko ja·rikgija da·ona kingkingba kam on·anirangko on·angkuchina didiangaha. Unbaksana Expert Committee-rangni batanggimin jarango Office Memorandum-o adita dingtangataniko dakaniko ra·galchina aro gitcham dongimin niamo A·chikrangna a·kanggimin Job Reservation-ko on·angkuchinaba ACHIK dolrang mol·molangaha.
Gittamgipao Meghalaya a·dok bilsi 50 gapilahaoba, Job Reservation Policy-o A·chikrangna a·kanggimin biapko A·chik jatna jakkalgija kamrangko on·anio namen komibeani gimin ia backlog-rango pangchake A·chikrangko kamrango rimnape gapatchina dabiangaha.Bon·kame pilak sorkari baksa adita bak donggipa department, private company aro agency rango Meghalaya Job Reservation Policy, 1972 ko ra·gate a·dokni manderangna indakgipa biaprango kamrangko on·chinaba ACHIK dolrang didiangaha.
