Lok Sabha election ni ja·man a·doko scientific coal mining-ko a·bachengatna bang·gija somoirangni gisepon u·iatanggen ine Chief Minister Conrad Sangma parakangaha. Ma·mong sorkari baksa pilak dakna nanggni kamrangko matchotaha aro a·doko mitam dakna nanggnirang dongkuenga ineba Sangma agandapangaha.
Sangma, koela bikotna am·ani koborna manderangni kusi ong·soani gimin talatengon, gipin a∙songrango koela donggipa biaprang sorkarini ong∙a, Meghalaya a∙doko koela donggiparang manderangni a∙arangsa ong∙a ine aganangaha. A∙doko ian skanggipa changna scientific coal mining-ko ra∙baengani gimin kamrangko ka∙anio ma·mong sorkari baksa name simsake kamrangko ka∙na nangani ga∙akenga ineba Sangma aganangaha.
Iani gisepon koela cho∙aniko dontongatani ja·man High Court ni dingtang dakgipa janggitangani cholko manderangna on∙china ge∙etaniko man∙e, a∙dok sorkari re∙anggipa bilsi 5 o koela donggipa biaprango Lakadong mission ba haldi ge∙atanirangko dake ge∙e chagipa aro Self Help Group (SHG) rangna janggitangani cholrangko on∙aha ine Sangma aganangaha. Apsan dake dingtang dingtang program jekai SHG movement aro CM Elevate rangko ra∙gate koelao janggitanggipa manderangna dingtang janggitangani cholrangko ra∙bae on∙aha ine CM janapangjolaha.
