Ia bilsini Class XII porikkako seanggipa chatro chatrirangna Career Counseling Program-ko Garobadha Higher Secondary School-o Tura ICFAI University da·alo ong·atangaha. Ia program-ko ong·atani miksonganiara mikkangchi chatro chatrirangna poraiani a·bao namgipa cholrangni bidingo ma·siatna aro uamangni basegimin ramarango chu·sokgipa ong·china ong·atangaha.
Ia Career Counseling Program-ko Tura ICFAI University-ni sapgipa skigiparangni dilanio, chatro chatrirangna poraiani a·bao uamangni gisik nangani, bil aro miksonganio pangchake mikkangchi ja∙kurangko de∙angchina saksa sakgipin baksa golpogrike skie ra∙angna cholko on∙angaha. Unbaksana dingtang dingtang cholrangni bidingoba jekai tang∙dobaenggipa industry-rango, entrepreneurship aro business-ni a∙bao bimchipe skie ra∙e u∙i ma∙sie ja∙ku de∙angchina, Dept. of Management-ni Asst. Professor Dr. Brenda D. Marak uamangna gamchatgipa ku∙pattianirangko on∙angaha.
NEP 2020 aro IT industry-rango nanggipa skie ra∙anirangko man·agita IT Dept. ni Asst. Professor Sumit Dey aganangaha. Ia programko Garobadha Higher Secondary School ong∙atna man∙anina aro chatro chatrirang baksa bite gnanggipa chanchirimaniko dake golpogrikangna man∙aninaba ICFAI University Meghalaya-ni Senior Administrative officer, Muktadul Hussain aganangskaaha.
ICFAI University dingtangmancha poraienggipa chadamberangna nambata u∙i ma∙sianiko on∙an baksana chatro chatrirangna ka∙dongataniko bariatna aro gisik nanganiko nigrike pangnan kamrangko ka∙angenga ine Garobadha Higher Secondary School-ni Principal Bestling A. Sangma mittelpilskaani kattarangko aganangaha.
