New Delhi-o chang dokgipa Youth Co:Lab National Innovation Dialogue-ko mijalo matchotatani somoio ge·dok start-up rangko seokanio A·chikrangoni sakgni an·tangtangni seng·aniko jakkale songsalo neng·nikanirangko namdapatna namgipa chanchianiko ra·baanio chegipa ong·baaha. Ia start-up rang chonchongipa game cha∙giparangna ge∙a gamanio gital cholrangko jakkalna AgriTech-nigita tang·doatna dakchakanirangko on·gipa ong·a.
United Nations Development Programme (UNDP) aro Citi Foundation, Youth Co:Lab ko 2017 bilsio a·bachengataha jean Asia-Pacific ni arsongrangni chadamberangko bilakatna Sustainable Development Goals (SDGs) ko ra·bae dilgipa ong·na, songsalko namdapatna dangdike on·a aro gitalgipa cholrangko a·bachenge namgniko ra·bana miksonge ja·ku de·ani ong·a. India a·songo Youth Co:Lab ko 2019 bilsio Atal Innovation Mission, NITI Aayog baksa bakrime a·bachengatskaaha.
2023-24 bilsio Youth Co:Lab-o bakko ra·na India a·songoni ge 209 dorgastorangko galaoniko ge 36 start-up rangkosan seokako man∙aha jeon sak dok chegiparangna uamangni namgipa cholrangko ra·baanio tang·doatna 3,000 USD mangnigita tangka paisarangko dakchakanggen. Sak dok chegiparanga Deepak Rajmohan, Riksrang Momin, Richa Shukla, Prantish Francis Narzary, Prerit Rathi aro Dohaapia Momin ong·a. Riksrang Momin Agriculture Fintech and Insurtech for small and marginal farmers-o cheaha aro Dohaapia Momin Assistive Technology and Solutions-o chegipa ong·skaaha.
Ia sak 6 chegiparangoni gisepo sakgni A·chikrang chegipa ong·aniara jatna rasongko ra·baan baksana game cha·giparangna namgipa cholko ra·bana jotton ka·aniko mesokani ong·a.
