Assam aro Meghalaya sima ari jolni Ri-bhoi a·jao ga·akgipa Maikhuli songo a·a chiani bidingo a·dok ge∙gnini manderang nanggrikangaha. NGO ni dilgipa saksani u·iatanigitade, Assam-ni manderang Meghalaya-o ga·akgipa ramako champenge manderangko re·rurana on·jaha ine parakataha. Ramako champengani gimin sing·on, ia biap Assam-osa ga·ake ine uamang aganchakangaha.
Uamangni ong·gija dakako nike adita nanggrikangani ja·mano Assam-oni Gaonbura aro Magistrate saksa Chandmari aro Ulubari ni manderangko rimbae ka·mikkenataha ine parakataha. Ia Gaonbura aro Magistrate, batanggimin chango Maikhuli kal·chakram biap sepango donggipa sign board ko pe·anioba jak donggiparang ong·a ine u·iataha.
Iani bidingo Meghalaya pulis na badi ka·genchimoba, thanani pulisrang dorgastoko ra·chakna jechakaha ine NGO dilgiparangoni ma·gipa saksa parakataha. Ia obostako nike an·tangtangan uamangni a·ana dakgrikangna ja·ku de·e Nongpoh oni re·bagipa Magistrate ni dakchakanichi peng·e dongipa ramako kuliataiaha ine koborna parakataha.
