Re·anggipa May 6 tariko Shillong Polytechnic-o 4 gipa semester-ko poraienggipa an·tangko kae sianggipa chatri Diana Dimre Ch. Marak-ni ma·drang Chambugong aro Tegite dolgni maharirang kae sianiko ra∙chakana man∙jae, Mawlai Police Station-o badi ka·angaha. Uamangni badi ka·anio sianggipani dingtang dingtang be∙enni bakrango an∙chi kamani dagirang donga ine uamang janapangaha aro dagirangni photorangkoba badi ka·gipa baksa on·chapataha.
An∙chi kamani dagi aro matanirangko 7 tariko sianggipako MSME Quarter, Dakgopgre, Tura-ona ra∙bae manggisiko pujue dona skang rongtalataniko dakani somoio niknagita man∙aha aro iarangara doka satani dagirang ong∙a ine uamang sakkirangko on·angaha. Unbaksana 5 tariko, senior-rangna farewell program-ko ong∙atanio name chu·sokgipa ongjahani gimin porairimgipaskarangni uni kosako matnangani bidingo ma·gipa pagipana call ka·e aganataha ine janapangan baksana sak 5 porairimgipa skarangni bimingrangko aganataha ine u·iatangaha.
Indake ong∙engon uni kae sianiko ra∙chakna man∙jae, foot 5 ni me∙chik mande maikai indita chugipa grill ko gadona man∙gen ine janapan baksana dakchakgipa gride maming dakeba man∙jawa ineba aganangaha. Unbaksana uni manggisiko ma·drang maharigri kae siaoniko ra∙onsoanikoba ra∙chakna man∙gijani kattako aganangaha.
Una agreba sianggipani bidingo Shillong Polytechnic-ni Additional Director, WL Warjri ma∙gipa pagipana maming kobor on∙ataniko dakajaha ine janapangaha. Apsan daken Institution aro porairimgipaskarangnigitaba maming kalimapaani kattarangko on∙atani dongjaninaba suk ong∙gijaniko parakangaha.
