Garo Hills Environment Protection Society (GHEPS), GHADC-ni Forest & Environment Department aro dingtang dingtang mondolirang nangrime May 17 aro 18 tariko, Nokrek Daribokgre Simsang aro Sakalgre Ganol chibimani chibisik biaprangona re·ange bol ge·angaha. Ia somoio uamang bi·anirangkoba dakange ia jolrango songdonggipa manderangna mikrake dongchina ku·pattianirangkoba on·angaha. Uamang ia bol ge·aniko May-oni July jaona kingking dakna tik ka·angaha.
GHEPS, bilsi bongana nisanko done Garo Hills-o chiring chibisikrang tipangengani gimin, A·chik a·songni dingtang dingtang chibisikrangona re·ange bol ge·aniko dakna miksongangenga. Uamang manderangna mikrakataniko on·e, chiring chibimarangni chibisikrango bolrangko ge·dapna, ripingna aro simsakna ku·monge kamrangko ka·angenga. Sakantian daito ra·e ku·monge kam ka·genchimode Garo Hills-o bol wa·arang aro chiring chibisikrang tangchapiltaigen ine GHEPS ni dilgiparang aganangaha.
Unbaksana Meghalaya sorkarinigitaba mikkangchi an·chingni A·chik a·songo chibisikni biaprangko namdapatna krenge kamrangko ka·angode nambegipa ong·gen ine GHEPS-nigita didiataha.
